*ਬਾਜਾਖਾਨਾ ਟੀ ਪੁਆਇੰਟ ਤੋਂ ਪਿੰਡ ਸੰਘੇੜਾ ਤੱਕ ਜਾਂਦੀ ਸੜਕ ਦਾ ਨਾਮ "ਬਾਬਾ ਕਾਲਾ ਮਹਿਰ ਬਾਈਪਾਸ" ਰੱਖਣ ਦੀ ਮੰਗ

*ਬਾਜਾਖਾਨਾ ਟੀ ਪੁਆਇੰਟ ਤੋਂ ਪਿੰਡ ਸੰਘੇੜਾ ਤੱਕ ਜਾਂਦੀ ਸੜਕ ਦਾ ਨਾਮ "ਬਾਬਾ ਕਾਲਾ ਮਹਿਰ ਬਾਈਪਾਸ" ਰੱਖਿਆ ਜਾਵੇ - ਸਾਬਕਾ ਚੇਅਰਮੈਨ ਐਡਵੋਕੇਟ ਰੁਪਿੰਦਰ ਸਿੰਘ ਸੰਧੂ 

ਬਰਨਾਲ਼ਾ,  (ਕੇਸ਼ਵ ਵਰਦਾਨ ਪੁੰਜ) : ਸਥਾਨਿਕ ਸੰਧੂ ਪੱਤੀ ਦੇ ਸਾਰੇ ਅਗਵਾੜਾਂ ਦੇ ਮੋਹਤਬਰਾਂ ਅਤੇ ਬਹੁਤ ਸਾਰੀਆਂ ਹੋਰ ਸੰਸਥਾਵਾਂ ਦੇ ਮੁਖੀਆਂ ਨੇ ਪੰਜਾਬ ਸਰਕਾਰ ਅਤੇ ਨਗਰ ਕੌਂਸਲ ਬਰਨਾਲ਼ਾ ਤੋ ਮੰਗ ਕੀਤੀ ਹੈ ਕਿ ਬਾਜਾਖਾਨਾ ਟੀ ਪੁਆਇੰਟ ਤੋਂ ਰਜਵਾਹੇ ਦੇ ਨਾਲ ਨਾਲ ਸੰਘੇੜਾ ਪਿੰਡ ਤੱਕ ਜਾਂਦੀ ਸੜਕ ਦਾ ਨਾਮ "ਬਾਬਾ ਕਾਲਾ ਮਹਿਰ ਬਾਈਪਾਸ" ਰੱਖਿਆ ਜਾਵੇ। ਇਹ ਮੰਗ ਕਰਦਿਆਂ ਜਿਲਾ ਪਲੈਨਿੰਗ ਬੋਰਡ ਬਰਨਾਲ਼ਾ ਦੇ ਸਾਬਕਾ ਚੇਅਰਮੈਨ ਰੁਪਿੰਦਰ ਸਿੰਘ ਸੰਧੂ ਨੇ ਕਿਹਾ ਹੈ ਕਿ ਆਮ ਤੌਰ 'ਤੇ ਇਸ ਸੜਕ ਨੂੰ 'ਸੰਘੇੜਾ ਬਾਈਪਾਸ' ਹੀ ਕਿਹਾ ਜਾਂਦਾ ਹੈ, ਜਦਕਿ ਆਈ ਟੀ ਆਈ ਤੋਂ ਸੰਘੇੜਾ ਪਿੰਡ ਤੱਕ ਜਾਂਦੀ ਸੜਕ ਦਾ ਨਾਮ ਵੀ 'ਸੰਘੇੜਾ ਬਾਈਪਾਸ' ਹੈ। ਇਸ ਲਈ ਬਾਹਰੋਂ ਆਏ ਲੋਕਾਂ ਨੂੰ ਕਾਫੀ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ, ਖਾਸ ਕਰਕੇ ਬਾਹਰੋਂ ਆਏ ਟਰੱਕ ਵਾਲਿਆਂ ਅਤੇ ਹੋਰ ਟਰਾਂਸਪੋਰਟਰਾਂ ਨੂੰ ਐਡਰੈਸ ਲੱਭਣ ਵਿੱਚ ਭਾਰੀ ਪ੍ਰੇਸ਼ਾਨੀ ਹੁੰਦੀ ਹੈ। ਉਹਨਾਂ ਕਿਹਾ ਕਿ ਬਾਜਾਖਾਨਾ ਟੀ ਪੁਆਇੰਟ ਤੋਂ ਸੂਏ ਦੇ ਨਾਲ ਨਾਲ ਪਿੰਡ ਸੰਘੇੜਾ ਤੱਕ ਜਾਂਦੀ ਸੜਕ 'ਤੇ ਬਾਬਾ ਕਾਲਾ ਮਹਿਰ ਗੁਰਦੁਆਰਾ ਸਾਹਿਬ, ਬਾਬਾ ਕਾਲਾ ਮਹਿਰ ਸਟੇਡੀਅਮ, ਬਾਬਾ ਕਾਲਾ ਮਹਿਰ ਸਕੂਟਰ/ਮੋਟਰਸਾਈਕਲ ਮਾਰਕੀਟ ਸਥਿਤ ਹੈ, ਇਸ ਲਈ ਇਸ ਸੜਕ ਦਾ ਨਾਮ "ਬਾਬਾ ਕਾਲਾ ਮਹਿਰ ਬਾਈਪਾਸ" ਰੱਖਿਆ ਜਾਣਾ ਚਾਹੀਦਾ ਹੈ। ਉਹਨਾ ਦੀ  ਇਸ ਮੰਗ ਦੀ ਹਿਮਾਇਤ ਬਾਬਾ ਕਾਲਾ ਮਹਿਰ ਗੁਰਦੁਆਰਾ ਸਾਹਿਬ ਦੇ ਪ੍ਰਧਾਨ ਸੁਰਜੀਤ ਸਿੰਘ ਸੰਧੂ, ਬਾਬਾ ਕਾਲਾ ਮਹਿਰ ਸਪੋਰਟਸ ਕਲੱਬ ਦੇ ਨੁਮਾਇੰਦੇ ਸੋਨੀ ਜਾਗਲ, ਸਾਬਕਾ ਚੇਅਰਮੈਨ ਸੁਖਮਹਿੰਦਰ ਸਿੰਘ ਸੰਧੂ, ਐਸ ਡੀ ਸਭਾ ਦੇ ਚੇਅਰਮੈਨ ਸ਼ਿਵਦਰਸ਼ਨ ਕੁਮਾਰ ਸਰਮਾ, ਜਨਰਲ ਸਕੱਤਰ ਸ਼ਿਵ ਸਿੰਗਲਾ, ਬਾਬਾ ਕਾਲਾ ਮਹਿਰ ਸਕੂਟਰ/ਮੋਟਰਸਾਈਕਲ ਮਾਰਕੀਟ ਦੇ ਨੁਮਾਇੰਦੇ ਤੇਜਾ ਸਿੰਘ ਵੀਨਸ, 'ਆਪ' ਆਗੂ ਬਿੰਦਰ ਸਿੰਘ ਸਮੇਤ ਸੰਧੂ ਪੱਤੀ ਬਰਨਾਲ਼ਾ ਦੇ ਸਾਰੇ ਹੀ ਅਗਵਾੜਾਂ ਦੇ ਮੋਹਤਬਰ ਸੱਜਣਾਂ ਨੇ ਕਿਹਾ ਹੈ ਕਿ ਇਸ ਸੜਕ ਦਾ ਨਾਮ "ਬਾਬਾ ਕਾਲਾ ਮਹਿਰ ਬਾਈਪਾਸ ਰੱਖਣ ਨਾਲ ਜਿਥੇ ਲੋਕਾਂ ਨੂੰ ਸਹੂਲਤ ਹੋਵੇਗੀ, ਉਥੇ ਸੰਧੂ ਭਾਈਚਾਰਾ ਵੀ ਮਾਣ ਮਹਿਸੂਸ ਕਰੇਗਾ।