ਮਜਦੂਰ ਦੀ ਲਾਸ਼ ਮੋਰਚਰੀ ਵਿੱਚ ਰੱਖ ਯੂਨੀਅਨ ਨੇ ਦਿੱਤਾ ਧਰਨਾ

 ਮਜਦੂਰ ਦੀ ਲਾਸ਼ ਮੋਰਚਰੀ  ਵਿੱਚ  ਰੱਖ ਯੂਨੀਅਨ  ਨੇ ਦਿੱਤਾ  ਧਰਨਾ

        ਕਮਲੇਸ਼ ਗੋਇਲ ਖਨੌਰੀ 

 ਖਨੌਰੀ 14 ਨਵੰਬਰ - ਬੀਤੇ ਦਿਨ ਸੁਕਰਵਾਰ ਸਮਾਂ ਕਰੀਬ 3 ਵਜੇ ਪਿੰਡ ਸਲੇਮਗੜ੍ਹ ਮੇਨ ਰੋਡ ਨੇਡ਼ੇ ਸਥਿਤ ਸ਼ੋਅਰੂਮ ਦਾ ਲੈਂਟਰ ਡਿੱਗਣ ਕਾਰਨ ਪਿੰਡ ਢੀਂਡਸਾ ਦੇ ਮਜਦੂਰ ਗੁਰਪ੍ਰੀਤ ਸਿੰਘ ਦੀ ਮੋਕੇ ਤੇ ਮੌਤ ਹੋ ਗਈ ਸੀ , ਉਸ ਦੀ ਲਾਸ਼ ਮੂਨਕ ਸਰਕਾਰੀ ਹਸਪਤਾਲ ਦੀ ਮੋਰਚਰੀ ਵਿਚ ਪਈ ਹੈ ਤੇ ਉਸਦੇ ਨਾਲ ਦੇ ਪੰਜ ਮਜ਼ਦੂਰ ਜੋ ਗੰਭੀਰ ਰੂਪ ਵਿਚ ਜ਼ਖਮੀ ਸੰਗਰੂਰ ਦੇ ਸਰਕਾਰੀ ਹਸਪਤਾਲ ਵਿੱਚ ਜ਼ੇਰੇ ਇਲਾਜ ਪਏ ਹਨ l ਦੂਜੇ ਪਾਸੇ ਮ੍ਰਿਤਕ ਅਤੇ ਜ਼ਖਮੀਆਂ ਦੇ ਪਰਿਵਾਰ ਨੂੰ ਇਨਸਾਫ ਦਿਵਾਉਣ ਲਈ ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ   ਅਤੇ ਭਾਰਾਤਰੀ ਜਥੇਬੰਦੀ ਭਾਰਤੀ  ਕਿਸਾਨ ਯੂਨੀਅਨ ਏਕਤਾ ਉਗਰਾਹਾਂ ਦੀ ਪਿੰਡ ਢੀਂਡਸਾ ਇਕਾਈ ਦੇ ਸਰਗਰਮ ਵਰਕਰ ਅਤੇ ਪਿੰਡ ਵਾਸੀਆਂ ਦੇ ਸਹਿਯੋਗ ਨਾਲ ਤਹਿਸੀਲ ਕੰਪਲੈਕਸ ਮੂਨਕ ਵਿਖੇ ਅੱਜ ਦੂਜੇ ਦਿਨ ਵੀ ਧਰਨਾ  ਜਾਰੀ ਹੈ l ਅੱਜ ਦੇ ਧਰਨੇ ਨੂੰ ਸੰਬੋਧਨ ਹੁੰਦਿਆਂ ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ ਦੀ ਸੂਬਾ ਕਮੇਟੀ ਮੈਂਬਰ ਹਰਭਗਵਾਨ ਸਿੰਘ ਮੂਨਕ ਅਤੇ ਜ਼ਿਲ੍ਹਾ ਆਗੂ ਗੋਪੀ ਗਿਰ ਕੱਲਰ ਭੈਣੀ ਨੇ ਕਿਹਾ ਕਿ ਉਕਤ ਹਾਦਸੇ ਵਿਚ ਪੀੜਤ ਗਰੀਬ ਪਰਿਵਾਰਾਂ ਨੂੰ  ਪੰਜਾਬ ਸਰਕਾਰ ਤੋਂ ਯੋਗ ਮੁਆਵਜ਼ਾ ਲੈਣ ਦੇ ਲਈ ਕੱਲ ਤਸੀਲਦਾਰ ਸਾਹਿਬ ਨੂੰ ਮੰਗ ਪੱਤਰ ਦਿੱਤਾ ਗਿਆ ਸੀ , ਪ੍ਰੰਤੂ ਹੁਣ ਤੱਕ ਜ਼ਿਲ੍ਹਾ ਸੰਗਰੂਰ ਦੇ ਸਿਵਲ ਪ੍ਰਸ਼ਾਸਨ ਅਤੇ ਭਗਵੰਤ ਮਾਨ ਦੀ ਸਰਕਾਰ ਵੱਲੋਂ ਇਸ ਹਾਦਸੇ ਸਬੰਧੀ ਕਿਸੇ ਤਰ੍ਹਾਂ ਦਾ ਕੋਈ ਵੀ ਐਕਸ਼ਨ ਲੈ ਕੇ ਹਾਦਸੇ ਸਬੰਧੀ   ਪੀਡ਼ਤ ਪਰਿਵਾਰਾਂ ਨੂੰ ਕਿਸੇ ਤਰ੍ਹਾਂ ਦੀ ਸਹਾਇਤਾ ਸਬੰਧੀ ਪੇਸ਼ਕਸ਼ ਨਹੀਂ ਆਈ ਜਦੋਂ ਕਿ ਜਥੇਬੰਦੀਆਂ ਲਗਾਤਾਰ ਪੀਡ਼ਤਾਂ ਲਈ  ਮੰਗ ਕਰ ਰਹੀ ਹੈ ਕਿ ਮ੍ਰਿਤਕ ਦੇ ਪਰਿਵਾਰ ਨੂੰ ਦੱਸ ਲੱਖ ਰੁਪਏ ਮੁਆਵਜ਼ਾ ਇਕ ਸਰਕਾਰੀ ਨੌਕਰੀ ਅਤੇ ਪਰਿਵਾਰ ਸਿਰ ਚੜ੍ਹਿਆ ਸਰਕਾਰੀ ਗੈਰ ਸਰਕਾਰੀ ਕਰਜ਼ਾ ਮੁਆਫ ਅਤੇ ਜ਼ਖ਼ਮੀਆਂ ਦੇ ਇਲਾਜ ਸਾਰੇ ਖਰਚੇ ਦੀ ਜ਼ਿੰਮੇਵਾਰੀ  ਪੰਜਾਬ ਸਰਕਾਰ ਜਾਂ ਸੰਗਰੂਰ ਜ਼ਿਲ੍ਹੇ ਦੇ ਡੀ ਸੀ ਸਾਹਬ ਰੈੱਡ ਕਰਾਸ ਵੱਲੋਂ ਖ਼ੁਦ ਚੁਕਣ ਜੇ ਕਰ ਲੋਕਲ   ਪ੍ਰਸ਼ਾਸਨ ਅਤੇ ਪੰਜਾਬ ਸਰਕਾਰ ਨੇ ਇਨ੍ਹਾਂ ਮੰਗਾਂ ਵੱਲ ਧਿਆਨ ਨਾ ਦਿੱਤਾ ਤਾਂ ਆਉਣ ਵਾਲੇ ਸਮੇਂ ਵਿੱਚ ਜਥੇਬੰਦੀਆਂ ਕੋਈ ਤਿੱਖਾ ਐਕਸ਼ਨ ਕਰਨ ਲਈ ਮਜਬੂਰ ਹੋਣਗੀਆਂ l ਇਸ ਦੀ ਸਾਰੀ ਜ਼ਿੰਮੇਵਾਰੀ ਲੋਕਲ  ਪ੍ਰਸ਼ਾਸਨ ਦੀ ਹੋਵੇਗੀ l ਅੱਜ ਦੇ ਧਰਨੇ ਨੂੰ ਹੋਰਨਾਂ ਤੋਂ ਇਲਾਵਾ ਕਿਸਾਨ ਬਲਾਕ ਆਗੂ ਰਿੰਕੂ ਸਿੰਘ ਮੂਨਕ ਸੁਖਦੇਵ ਸਿੰਘ ਕੜੈਲ ਬੰਟੀ ਸਿੰਘ ਢੀਂਡਸਾ ਵਿਦਿਆਰਥੀ ਆਗੂ ਹੁਸ਼ਿਆਰ ਸਿੰਘ ਨੇ ਵੀ ਸੰਬੋਧਨ ਕੀਤਾ l